محَمّد

ده رابع رمضان يمر على المكان ده .. سبحان الله السنين طارت … وكالعادة هقضيه وحيدا … اهلي كلهم سافرو العمرة تلات اسابيع .. وبالتالي عودة مرة اخرى لحياة العزوبية .. خلاف نقطة وحيدة جديدة حصلت في حياتي الفترة اللي فاتت …ان ربنا كرمني ولقيت بنت الحلال اللي هكمل معاها بقية حياتي ان شاء الله .. طبعا ما زلنا في مرحلة الخطوبة .. ربنا يكرم ويتمم لنا على خير .

حبيت بس اقول كل عام وانتم بالف خير.. مبارك عليكم الشهر .. وربنا يتقبل منا ومنكم ..

في امان الله

بالضبط من سنة فاتت كانت اليوم ده آخر عهدي بكليتنا الموقرة .. كلية الصيدلة… ارتحت من مسيرة 17 سنة دراسة وامتحانات… ده اول صيف يبدا معايا من غير امتحانات.. بس مخبيش عليكم.. اشتقت للجو ده…. جو الامتحانات والضغط والشعور بالحرية والفرحة بعد ما تخلص الامتحان .. حاجات حلوة كتير كانت في الفترة دي … بس خلاص بقى.. فترة وخلصت..

دخلنا في جو الحياة العملية الحمدلله وبدأنا اول خطوة في المشوار ده.. البداية كانت صعبة مشوشة وغير مستقرة ومازالت لغاية دلوقتي بس الحمدلله احسن من الاول … في امور كتيرة بقى لازم ابدا اخد فيها خطوة برضو بعد موضوع الشغل… اهمها اكمل دراساتي في مجال معين نفسي فيه… ( هتكلم عنه بالتفصيل ان شاء الله ) .. اسعى في موضوع الزواج ونكمل نص ديننا … ابدا على الاقل افكر في مشروعي اللي عاوز ابدا بيه بعد 10 سنين من دلوقتي ان شاء الله .. ان كان في العمر بقية .. حتى الان وضعي لم يستقر تماما.. محتاج شوية وقت وجهد .

بــــس … اللي خايف منه ومش عاوز أقع فيه.. الدوامة اللي بيدخل فيها كتير من البشر.. استلم وظيفة.. اتجوز.. وجاب اطفال.. يفضل بقى شغال  يلف في الدوامة دي.. شغل واطفال وزوجة … طبعا ده لا عيب ولا حرام ولا عندي اي اعتراض عليه بالعكس شئ رائع وسنة الحياة … لكن…في حاجات تانية ممكن تتعمل  .. حاجات اعملها لنفسي او لغيري.. الخيارات والمجالات كتيرة وفي كل حاجة!..عارف ان كتير مننا نفسه انه ميدخلش الدوامة دي لكن ضغوط الحياة بتجبر الواحد انه بتنازل عن احلام وطموحات كتير …عشان نعيش.

كانت فضفضة سريعة كده حبيت اطلع اللي جوايا… ان شاء الله السنة الجاية في نفس ذات اليوم ده افضفض برضو و أكون عملت اي حاجة من اللي بتمناها دلوقتي أو على الاقل بدأت فيها…

في أمان الله

انا مش جاي اتكلم واقول الناس وكاس العالم و مهتمين بيه و ليه والكلام الكتير ده لانو مش هيغير حاجة … بس عاوز اتكلم في حاجة معينة بس…من اسبوع بالضبط كان الكل هايج ودمه حامي  وبالذات في عم التويتر بتاعنا…عشان اسطول الحرية اللي كان متجه لغزة .. كلنا كنا شغالين نتكلم وندعي ونزعل من مواقف ناس ونفرح من مواقف ناس تانية و هيصة ملهاش اول من آخر ..

وفـــــجــأة !!! …. اده مين طفى النور؟؟

كلو اختفى.. في ظرف اسبوع زمن.. رجعنا نمنا تاني… العالم كله قام واتنرفز وشتم وندد وشجب  … والخ الخ … وبعدين… اسرائيل نفذت اللي في دماغها.. احنا اخدنا فوق دماغنا… ورجعنا ساكتين تاني.. نفس الموضوع حصل السنة اللي فاتت لما انضربت غزة …وبعـــــديــن؟؟!!

شرفنا كاس العالم… الكل اتلهي .. الكل قعد يجري عشان يشتري بطاقات الجزيرة الرياضية عشان يتفرج .. غير اللي نزلو في القهاوي بتفرجو … غير اللي سافروا وراحو يتفرجو. وغير وغير .. . مش عيب ولا حرام .. والمشكلة مش في كاس العالم بـــس!!

.. حد فاكر غزة ؟؟ حد فاكر فلسطين؟؟ حد فاكر أصلا اسرائيل..؟؟؟؟

بننسى او نتناسى .. بنرجع نعمل نفسنا مش واخدين بالنا…طيب لغاية امتى… بنعلق عجزنا على شماعة الحكومات والحكام … انا مبقولش نقوم نهب نروح نطخ اسرائيل ولا نعمل مظاهرات ولا نصوت ولا نحرق كاوتشات واعلام … بس على الاقل..على الاقل

نفضل فاكرينها… مش حاجة صعبة …. نفضل نكتب عنها.. مش لازم تحصل مصيبة عشان نفتكرها… وانا وهبدا بنفسي ان شاء الله… على الاقل كل شهر لازم اكتب حاجة.. ان شاء الله كلمة فلسطين حاف.. بس نفتكرها…صورة شعر تدوينة..

ربنا ينصرهم ويثبتهم وويقويهم ويخزي عدونا و عدوهم

دي كانت حاجة كده على السريع.. …

في أمان الله