محمد مين ؟

 محمّد ..شاب مسلم مصري … خريج كلية صيدلة… مستشفى الكورنيش في أبوظبي وبالتحديد ثاني يوم من سنة 1986 .. كانت هيا المكان اللي سمع اول صرخة ليه بعد ما طلع للحياة … عاش ومازال تقريبا كل سنين عمره في الامارات.. وبالتحديد أبوظبي… اللي اقدر اسميها بلدي التاني

شاب عادي .. وبيحاول ميكونش عادي..  لسا بيخطو اول خطواته في الحياة العملية…شغال حاليا في مؤسسة حمد الطبية في قطر .. وبالأخص مستشفى الوكرة  ….. بيحب حاجات كتير اوي .. لعب الكورة .. تزلج على الجليد .. سباحة… المشي .. البحر.. الطبيعة.. السفر .. وغيرو كتير

سيرتي الذاتية


حاجات ملهاش دعوة ببعض ~

  • عفوي جدا.. تلقائي.. مبعرفش امثل ولا اتصنع.. من الآخر.. اللي في قلبي على لساني ..
  • عنيد حبتين .. احيانا كتيرة بركب دماغي … ( دماغي ناشفة )
  • متسرع …. آه متسرع في حاجات كتير اوي… واتقرصت كام مرة .. مبتعلمش
  • قلبي ابيض.. بزعل أيوا …  لكن بصفى بسرعة و مش بشيل جوايا من حد…
  • أنا طيب … الكل بيقول كده…
  • مرح… بحب الضحك والهزار… بس مش دايما…
  • معارفي وصحابي كتار جدا الحمدلله وفي كل حتة وفي دول كتير
  • بحب المغامرة .. اجرب حاجات جديدة…
  • مبحبش الهيافة والكلام الفاضي و الحوارات اللي ملهاش لازمة
  • كنت عصبي .. حاليا بقيت أهدى كتير… الحمدلله
  • في حاجات كتير فيا محتاجة تتعدل.. وبحاول على قد ما أقدر
  • متزوج وأعول
  • على قد ما بحب اكون وسط لمة وناس .. لكن بحب اختلي بنفسي كتير وبالذات قدام البحر.
  • دماغي خليط من المعلومات الطبية والصيدلانية.. على حوارات الكمبيوتر والويب و  IT… وان كانت التانية هيا اللي تشغل الحيز الاكبر.
  • احيان كتير مبفهمنيش…
  • لا بشجع ولا بتابع اي نوع من انواع الرياضات يعني لا كورة ولا غيرو يعني لا اهلاوي ولا زملكاوي .. لكن غاوي العب كورة..
  • جوايا خليط من ثقافات مختلفة ومتنوعة .. بسبب نشأتي في مجتمع متعدد الجنسيات
  • بحب الاستقرار .. بس برضو بحب التغيير …
  • أكره شعور الفراغ .. بمعنى مبحبش اكون فاضي او من غير شغلة

ممممممم … في حاجات كتير تانية هضيفها بعدين … وبكده أكون غيرت الصفحة دي لاول مرة من 3 سنين

يمكنك تتبع أي تعليقات عن طريق خلاصات الـ RSS 2.0 .
التعليقات والـ pings مغلقة حالياً .

2 تعليقان على “محمد مين ؟”

  1. […] مــن أنــا ؟؟!! […]