محَمّد | صيدلي قد الدنيا

لأول مرة

محمد — Sun, 13 May 2012 08:06:29 +0000

انا وكام مليون مصري غيري في كل انحاء المعمورة هناخد الخطوة دي اخيرا ..بغض النظر عن كل ما يحدث الان في مصر .. الكلام والهذي والهمجية والتضليل والخ والخ… قررت المرة دي ابض للنص المليان من الكوب .. واللي يمثله الصورة في الاسهل …

اخيرا مصر هتختار حاجة اكبر من نكهة الشيبسي بتاعتها .. هتختار مصيرها .. مستقبلها وحاضرها ..مكانها في وسط العالم كله ..

مش هتكلم بقى عن المرشحين ومواقفهم واعمالهم دي بقى ترجع ليا ولاختياري واختيار كل واحد فينا .. كل اللي علينا ناخد بالأسباب ونسعى ونختار بناء عن قناعتنا مش قناعة ناس تانية… وندعي ربنا يولي علينا من يصلح …

الشهر ونص الجايين اهم فترة في تاريخ مصر واهم من اي حاجة تانية في مصر ..يارب تعدي على خير

دعواتكم لمصر

سكت الكلام …

محمد — Thu, 19 Apr 2012 04:22:02 +0000

من اكتر من شهر وانا بحاول اكتب هنا اي حاجة لكن مش عارف.. مش عارف اتكلم على مصر ولا سوريا ولا ليبيا ولا السودان ولا اليمن والبحرين ولا العراق والله اعلم ايه اللي جاي بعد كده.. مينفعش اتكلم عن اي حاجة تانية وسط اللي بيحصل ده .. الكل بيتكلم والكل بيصرح ويجتمع ويندد ويشجب ويفتي ويحلل ويصرح ويشرح ويحقق ويشكل .. ويبقى الحال على ما هو عليه ..يبقى مفيش فايدة من الكلام ..ومفيش حد بايده يعمل حاجة..

ربنا يتولانا برحمته

أواخر العشرينات ..

محمد — Mon, 02 Jan 2012 04:05:07 +0000

دايما اسمع الكلمة دي في أماكن كتير.. رجل في اواخر العشرينات .. فتاة في اواخر العشرينات وعادة مصحوبة بحادثة او جريمة او مشكلة ربنا يبعدهم عنا … اظن اني بدات أدخل ضمن تصنيف اواخر العشرينات ده من اليوم.. احساس غريب في المرحلة دي ..مش عارف اوصفه..

خلصت 26 سنة من التنفس والتفكير والاكل والنوم والدراسة واللعب .. وارهاصات اخرى ..

خلصت 26 من ممارسة الحياة والعيش على وجه البسيطة …

شفت وجربت ولسا هشوف واجرب اكتر ان كان في العمر بقية ..

وكل سنة وانا طيب …

الفشــل في النجاح

محمد — Tue, 20 Dec 2011 11:16:50 +0000

كنت محتار اكتبها بالفصحى ولا العامية.. لكن لقيت بالعامية هعرف اعبر صح واتكلم براحتي ..نرجع بقى للعنوان اللي فوق.. ازاي يعني الفشل في النجاح ؟؟ او ليه اسمها الفشل في النجاح ؟؟ مهو يا اما يفشل يا اما ينجح ؟ اما يفشل انه ينجح ؟؟ تيجي ازاي؟

في كلمتين .. اللي عاوز اوصل له من الجملة دي .. يعني نجاح غير مكتمل .. تكون قربت او في نص الطريق وتفضل محلك سر … يعني لا تقدر تقول على نفسك ناجح ولا تقدر تقول فاشل ..طيب برضو ازاي؟

نيجي نوضحها شوية .. مثلا : انت واحد من الناس عندك موهبة .. نقول مثلا .. الخط العربي.. يعني خطك جميل وكل اللي حواليك مبهورين بيه .. وانت عارف كده .. ونقول انك اخدت كمان دورات تنمي الموهبة دي .. وبس كده .. طيب وبعدين .. وقفت ليه ؟ مكملتش ليه؟ .. هتقولي اكمل ازاي؟ .. اقولك مش هوا ده السوال الصح .. السؤال صح في الحالة دي .. استغل موهبتي دي ازاي ؟؟ ازاي ابقى شخص ناجح بجد في موهبتي دي؟؟ … طبعا انت عارف الجواب .. وعارف الطريق .. بس حاطط قدامك حواجز وحجج بمختلف انواعها .. زي الوقت .. الفلوس.. الدراسة .. الشغل.. كلام الناس ..اي حاجة من دول او غيرها … يبقى انت هنا شخص ناجح وعندك مقومات كتيرة انك تبقى شخص ناجح ..لكن برضو مينفعش تتسمي ناجح .. طبعا انا مش بحصر النجاح في اللي عندو موهبة بس.. انا بضرب مثل لا اكثر.

مثال تاني :هذه الاية (الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا) .. وللامانة مجتش على بالي خالص بس كنت طرحت العنوان ده في تويتر للنقاش و كانت ده رد للأخت نجلاء على تساؤلي .. واظن الاية واضحة جدا ومش محتاجة توضيح اكتر …وده بجد اكتر حاجة نقدر نقول نطبق عليها المقولة دي.. ربنا يبعدنا عنه ويرزقنا الاخلاص في القول والعمل …

فــ انت لما تكون متقدرش تقول على نفسك انسان فاشل وفي نفس الوقت متقدرش تقول انسان ناجح .. اعرف انك قربت من النقطة دي .. وللاسف دي اسوأ في رأيي من انك تكون فاشل.. ليه ؟؟ لانك لما تحس انك فاشل .. هيكون عندك دافع كبير انك تنجح و انك تغير من نفسك .. على العكس في الحالة دي.. انت مش حاسس اصلا انك فاشل او ان في حاجة محتاجة تتغير .. وان امورك طيبة وفوق كده مش عندك الدافع القوي ..في حين انك ممكن تبقى احسن .. وتتطور وتبقى شخص ناجح بجد ..لو دورت جواك .

اسباب الموضوع ده كتيرة اوي.. منها التشتت وعدم وضوح الهدف.. الواحد مش عارف مكانو فين او عاوز يوصل لفين … ماشي في كذا طريق ..ومش محدد اي واحد فيهم طريقه .. وغير كده عدم الاستمرار في اي حاجة ابتدى فيها .

الموضوع عشان يتعدل محتاج قعدة طويلة وصريحة مع النفس ، ترتيب للأولويات .. تحديد نقطة البداية .. وبعدين البدء .. ومش لازم الواحد ياخده الحماس في الاول ويبدأ بداية قوية وبعدين يفتر الحماس ويرجع زي الاول وكأنك يا يابوزيد ما غزيت .. ( قليل دائم .. خير من كثير منقطع ) .. وفي الحديث عن النبي صلى الله عليه وسلم (( أحب الأعمال إلى الله أدومها وإن قل )) أخرجه البخاري .

طبعا كل الكلام ده تقدرو تسموه مجرد خواطر و أفكار كانت في بالي وحبيت احطها هنا ، احتمال اكون صح واحتمال اكون غلط .

وفي أمان الله

انتخبت ؟؟!!

محمد — Thu, 15 Dec 2011 03:46:37 +0000

العين كلها على مصر دلوقتي من أول ما بدأت الانتخابات فيها من حوالي شهر تقريبا ..بين مؤيد ومعارض وملوش دعوة بالموضوع اصلا.. اتعملت الانتخابات رغم كل الظروف اللي حصلت قبلها من فوضى وهمجية او كما اطلقو عليها ثورة الغضب الثانية.. مش عاوز اعلق على الهبل اللي حصل قبل الانتخابات في التحرير وشارع محمد محمود وشوية الناس اللي هناك فاكرة نفسها بتتكلم باسم مصر وشعبها .. وان مصر تتمثل فيهم ..

نيجي للانتخابات .. بدايتها كانت فتح التصويت للمصريين في الخارج لاول مرة .. وانا منهم … انا عني مسجلتش اسمي ولا انتخبت .. مش سلبية ولا مقاطعة مني بالعكس انا كنت فرحان بالانتخابات بس كان عندي وجهة نظر اني مش عايش في مصر ولا اعرف المرشحين ولا اعرف سمعتهم ولا هيعملوا ايه وبيعملو ايه .. وبرضو مش عاوز اسمع كلام ناس في مصر وكل واحد يمدح لي في المرشح بتاعه وبالتالي ممكن أضر اكتر من ما ممكن افيد .. طبعا دي وجهة نظري وتحتمل الصواب والخطأ …

تابعت الانتخابات زي الكل..من كل ناحية..على البي بي سي كل يوم الصبح اسمع حوارات وبرامج بخصوص الانتخابات وناس تتكلم هنا وهنا .. على صفحات الفيس بوك وتويتر .. وشوية جرايد ..شفت الحلو والسئ..اللي شغال يشتم واللي شغال يفتي واللي شغال ينقل ويعمل شير لاي حاجة في أي حاجة ..ومع تألق حزب الحرية والعدالة بتاع الاخوان ومن بعده سلفيو حزب النور.. ظهرت موجة تانية من ناس غريبة.. كل ما تتكلم تقولك سياحة وخمرة وبكينيي والحجاب .. دول هيخربو البلد .. ويجي بقى اللي يالف ويقولك دي هتبقى سعودية تانية ومفيش شغل للستات ولا هيسوقو عربيات .. وكلام كتير من ده وكأن مصر ماهي الا شوية ناس همها الخمرة والبكيني …وكل شوية يطلع ناس تهذي بتصريحات غريبة من كل الفئات وعلى كل الوسائل واليوتيوب بقى بيعيط من كتر الفيديوهات اللي اتعبى بيها عشان الحاجات دي ..

في وسط الزحمة دي كلها قليل اوي ما تسمع عن حد بيتكلم عن وضع مصر الصحي والتعليمي والاقتصادي وغيره واللي المفوض قامت الثورة عشانه .. وبالذات من الجماعة اللي مبيتين في التحرير وقدام مجلس الوزرا ليومنا هذا.. فاكرين نفسهم هما الناصحين وشغالين شتايم وتريقة وتخوين في احد يخالفهم ونفسي مرة اسمع حد فيهم بيقول حاجة عدلة ..كترو اوي على تويتر وغيره وبجد بقت حاجة تحرق الدم و تخزي وتحزن وتكسف قدام العالم ..

كلمة قالها الدكتور شريف عرفة وعجبتني

أيام الثورة كانت الشرعية لميادين التحرير فقط لأنه لم تكن هناك وسيلة أخرى للتغيير.. أما الآن فقد أصبح عندنا أحزاب حقيقية و انتخابات حقيقية و رأي عام حقيقي.. لذلك فالاعتماد على التحرير الآن تكاسل بالغ! دعك من أن إغلاق الشوارع و منع الوزراء من دخول مجلسهم، هو أعمال عنف و ليست مظاهرات سلمية.

نفسي بقى نرجع زي اي ايام التحرير ويكون كل همنا مصر والناس الكتير اوي اللي وضعها لا يسر عدو ولا صاحب ..

وادينا متابعين الانتخابات لاخرها .. وربنا يصلح الحال

في أمان الله

دوامة الحياة

محمد — Mon, 05 Dec 2011 03:36:55 +0000

شغل .. بيت . نوم .. اكل .. التزامات وأقساط .. هيا دي بشكل عام دوامة الحياة اللي مصيرنا كلنا نلف فيها ..حاجة كنت بحاول كل الفترة اللي فاتت بعد ما اتخرجت اني مدخلش جواها بشكل عميق واكون أسير لها .. كل شوية بحاول اجدد أو اغير او أعمل اي شئ مختلف … دايما بعلق على الناس اللي خلاص حطو نفسهم أسرى لدوامة الشغل والبيت والشغل والبيت … الخ .. لكن اكتشفت ان الموضوع بيكون مش بايدهم ولا برغبتهم .. اغلبهم بيتشد غصب عنه ويدخل جوا الدوامة دي، ومع زيادة أعباء المعيشة يوم عن التاني وزيادة الاسعار وزيادة أي حاجة تانية بيضطر الواحد انه يفضل يلف اكتر واكتر في الدوامة دي عشان يقدر يعيش …قليلين جدا اللي بيقدروا يخرجو من الدوامة دي او مش يتشدوا جواها بشكل كبير.. لكن اكيد هيكون على حساب حاجة اساسية من اساسيات حياتهم ..

وبما اني حاسس اني بدأت أتشد انا كمان جواها .. وعاوز ألحق نفسي بأي شكل قبل ما اتحبس ومقدرش اطلع تاني .. بحاول بأي شكل أوجد تغيير في حياتي لكن للأسف مش قادر استمر عليه .. بحاول مليش حياتي مش تمشي على رتم معين او نمط معين كل يوم .. لكن تأبي إلا ان تكون بالشكل ده.. بتطلع مستجدات أو عقبات ترجعك للدوامة دي اكتر واكتر .. محتاج الاقي افكار جديدة لحاجات جديدة ممكن اعملها في حياتي عشان متتحولش للنمطية دي … والله المستعان

في أمان الله

قالك ثورة !!! (2)

محمد — Fri, 11 Nov 2011 09:27:22 +0000

قبل ما ابدا أي حاجة في نقطتين حابب اوضحهم
الأولى : انا الثورة بالنسبة لي هيا اللي بدأت من 25 يناير لغاية 11 فبراير 2011 بعد كده انا مش شايف اي حاجة ممكن يطلق عليها اسم ثورة
التانية : انا واحد مليش علاقة بالثورة من قريب ولا من بعيد غير انها حصلت في بلدي اللي انا منها .. لا شاركت فيها ولا كنت معاهم و لا اي حاجة تانية وبالتالي انا مش جاي اركب الموجة

ليه كل واحد فاكر ان الثورة دي قامت عشانه هوا بس؟؟ وكل شوية تطلع فئة من حتة شكل تعمل اعتصام ولا مش عارف ايه وفاكرين ان كده هتتحل مشكلتهم … الموضوع بقى ماسخ الصراحة .. فكروني في الاول قبل الثورة لما كل شوية يطلع واحد يحرق نفسه مش عارف فين كده زي البوعزيزي .. مش عارف الناس دي بتفكر ازاي
مبارك ومحاكمة مبارك والمسخرة والمهزلة اللي حصلت واللي بتحصل فيها.. الناس داوشة نفسها بالراجل ليه .. ميولع بجاز المهم انه اتخلع …الثورة قامت عشان تصلح البلد مش عشان تحاكم مبارك .. واهو قاعد مذلول ملوش اي قيمة .. واللي يقعد يقولي بقى ده ماسك البلد من تحت لتحت وليه رجالته والحوارات الفكسانة دي .. هقل أدبي عليه بجد.. منسيبه مرمي كده في اي حتة ونشوف حال البلد وبعدين نفضى له على رواقة .
البلطجية والثوار … على اي اساس الواحد يعرف ان ده بلطجي ولا ده ثوار ..يعني مثلا تلاقي الشرطة قبضت على حد المفروض انه بلطجي وبيأذي الناس .. يطلع شوية يقولولك الشرطة بتمسك في الثوار وتحبسهم .. وبالتالي الشرطة احسن لها متقربش من حد اصلا وتتفرج من بعيد زي مهوا بيحصل دلوقتي .
أشكال كده غريبة طالعة في وسط الحوارات دي كلها على انهم ابطال ومنضالين وبتوع قضية .. وتشوف كلامهم تلاقي شتايم وكلام قبيح بتاع شوارعية وافكار منحلة ويطلع شوية ناس تقولك ملكش دعوة بيه ده بينه وبين ربه مش انت اللي تحاسبه .. بأي منطق؟؟ مش فاهم بجد .. مش هشكك في نوايا البشر دي لكن الطريقة اللي بيظهرو بيها .. (زبالة)
جلال عامر بيقول للي بيسأل ( مصر رايحة فين؟ ) مش تسأل الاول قبل ما تركب؟ … طب أسأل مين يا عم جلال؟
كمية المسميات والاحزاب والحاجات اللي طلعت بجد تخلي الواحد يلغ حوالين نفسه . اشي ليبراليين واسلاميين وعلمانين وارستوقراطيين وتكنوقراط وبقسماط وحاجات كتيرة بجد …

لك الله يا مصر …

قالك ثورة !!!

محمد — Wed, 09 Nov 2011 05:22:01 +0000

قبل ما ابدا أي حاجة في نقطتين حابب اوضحهم
الأولى : انا الثورة بالنسبة لي هيا اللي بدأت من 25 يناير لغاية 11 فبراير 2011 بعد كده انا مش شايف اي حاجة ممكن يطلق عليها اسم ثورة
التانية : انا واحد مليش علاقة بالثورة من قريب ولا من بعيد غير انها حصلت في بلدي اللي انا منها .. لا شاركت فيها ولا كنت معاهم و لا اي حاجة تانية وبالتالي انا مش جاي اركب الموجة

نيجي بقى للمهم بعد الصلاة على النبي عليه الصلاة والسلام ..

حابب بس الاول نشوف الكلمات اللي بتتداول بكثرة الفترة دي : المجلس العسكري.. المحاكمات العسكرية .. محاكمة مبارك ..السلفيين والاخوان .. ماسبيرو .. الليبراليين .. الاقباط .. مطالب فئوية .. عجلة الانتاج اللي واقفة … المشير وجزمة المشير وبدلة المشير .. الانتخابات بانواعها … انفلات أمني …الفلول … وجمعة كل يوم بقى ليها اسم شكل ( مخطط صهيوني الظاهر عشان يكنسلو يوم الجمعة ويمسحوه خالص ) .. زلطة ضعبيش ..

واكتر من حوالي 8 شهور وانا شغال اسمع الثورة ومش الثورة .. مبادئ الثورة .. اهداف الثورة .. شباب الثورة ..بتنجان الثورة … وانا مش شايف غير ان كل واحد او كل مجموعة من البشر عملو لنفسهم ثورة وعايشين فيها الدور و بقوة ..

من الاخر بعد 11 فبراير والثورة عمالة تتلاشى حبة حبة .. ممكن نقول عليها اي حاجة تانية غير كلمة ثورة … الثورة اتعملت ليه اصلا ؟؟ عشان تحاكم مبارك وتتشفى فيه ؟؟ ولا عشان شهداء الثورة ؟؟ ولا عشان تبين نوايا المجلس العسكري ..؟؟ ولا عشان تجري ورا الفلول ؟؟ ولا عشان ناس تظهر هنا وهناك وتتكلم في التلفزيون وتطلع في برامج ؟؟ ولا ايه بالضبط ؟

كل اللي انا عارفه زي أي بنى ادم طبيعي بيفهم .. ان الثورة قامت عشان حال البلد يتصلح زي تونس مثلا .. واظن مطلب بسيط جدا و محدش يختلف عليه .. لكن مش شايف خالص دلوقتي ان هوا ده اللي بيحصل او حتى ده اللي احنا ماشيين فيه …

على قد ما فرحت بالثورة وان الناس اجتمعت كلها على مطلب واحد ساعتها على قد ما انا حزين دلوقتي على الوضع اللي وصلنا ليه ده ..ياريت نشوف مصلحة البلد مش مصلحتنا احنا ..

معنديش في ايدي غير الدعاء وربنا يصلح حال البلد ويوصلها لبر الامان ..

في أمان الله

كنت عازب …

محمد — Fri, 16 Sep 2011 10:09:56 +0000

بفضل الله ودعت العزوبية بشكل رسمي والى الابد …الجمعة الماضية كان حفل عقد قراني على زوجتي وام اولادي ان شاء الله ( ايثار ) …

احساس جميل وجديد .. مرحلة جديدة من حياتي.. ربنا ييسرها من عنده وتبقى فاتحة خير وبركة

وعقبال كل اللي عاوز ومش عاوز ..

محمي: شوية كلام

محمد — Wed, 24 Aug 2011 08:37:17 +0000